‘Tindashomire kwonka Ruhanga akampwera naaba omugaiga’

Bushenyi, Burengyerwa Eizoba hamwe na Uganda yoona eri omu kucurira omugyenzi Mzee Zabroni Rushambuza ‘Ai Mukama’.

Omunyamakuru Chris Mugasha akaba yaashutamireho nawe yaamwihireho ebyaafayo bye namunonga ebikwatiraine n’okukora. Omukihandiko eki, Mzee Rushambuza akaba naashoborora orugyendo rwe n’emirimo ei akozire.

Note

We apologize to our readers for keeping it in Runyankole version)

Rushambuza natandika arikugira ati, “Mukama/Ruhanga tinkaamuhika, tinkamukwata mungaro, tinkaagamba nawe….n’ahabw’ekyo okuhandika ahanju n’okumusiima, nkamwebaza kandi nkaheereza eizina rye ekitinisa.”

“Amagara gangye gari omuri Ruhanga ahabw’okuba tindashomire kwonka akampwera naba omugaiga kandi nazaara n’abaana baatunga sente,” ebyo n’ebigambo bya Mzee Rushambuza ou baingi barikumanya nk’omugaiga omuri Bushenyi.
Eizina Rushambuza nirimanywa munonga omuri burengyerwa eizooba kandi rigarukire ryamanywa munonga ahabw’enshonga y’abaana omuri Kampala.

Okuyatandikire

Omu mwaka gwa 1938, Rushambuza n’omwe omu bantu abangyenzire n’ebigyere kuruga Bushenyi kuza Buganda kuhinga pamba. Obwire obwo bakaba bakoma entanda batambura baza Kampala kandi omu muhanda entanda ekaba ehwaho beemerera babanza kushaka eby’okurya.
Ebya Rushambuza bikaba bitoorobi. N’omwe omu bantu abakozireho omunguto (oruberera) na bwanyima kuyabaire arimu naakora, nikwo ow’ishemwe/omujunwa omwe ou yaabeire aherize kuraara nawe omuruteerane (night prayers) kumushanga aha murimo na bwanyima akamugira ati, “ow’ishemwe takora muruberera.”

Rushambuza aho akasharamu yakwatsa ebikoreso ahansi atyo omujunwa yaamushabira kuyaaherize, yaamugira ati, “irooko otaahe osherure emirimo ei abakuristaayo bakora.”

Okwiha obwo, Rushambuza akasharamu yaataaha yaashanga mukuru we omungyenzi George William Binyindo.
Bwanyima yaabazaire be kufa, Rushambuza akabanza yaapakasa owa mukuru we, omungyenzi Binyindo nabwanyima yaayega okwombeka, obwe arikureebera ahari Binyindo. Amaju gamwe agu arikwijuka ngu akombekaho, harimu Bweranyangi Junior, amashomero gamwe omuri Kyamuhunga, Kitagata, Bugamba, Ruhaama hamwe na Mbarara High School. Omu kuguma naatambura atyo, Rushambuza naagira ngu omu akeegyeramu okwombekyesa amatafaari. Aheishomero rya Kibubura Girls Ibanda , Rushambuza naagira ngu hariho ekyombeko ekiyateireho emikono ye akombeka.

Akaija yaaba omukugu omu by’okwombeka bwanyima y’okutunga okutendekwa kurungi kuruga omubasingasinga. “Kunakumugwaho oweishemwe ogwo, owanshabaire, obwe arikukoresa obushoboorozi bwa Ruhanga nkamugabira ente,” Rushambuza naraganisa.

Obwe atakagiire mumirimo y’okwombeka, Rushambuza akaba apakasa emirimo ye’emikono ahabw’okugira ngu ebintu ebi ishe yaatsigireho bikaba bitarikubaasa kureeberera abaana boona kandi bwanyima y’ishe kufa, ebintu ebiyabatsigiire bikabaganisibwa. Omu mwaka gwa 1942, Rushambuza akasharamu yaaza omu kanisa kushoma a e i o u bwanyima yaija yaaza kushoma oburonde obuyashomire omwaka gwona ahari Bweranyangi.
“Eishomero rikandema ahabw’okuba nkaba nkuzire n’emicwe yabariitsa! Kandi n’emyaka ekaba yantsigire ahabw’okugira ngu okushoma obwire obwo, kukaba kutariho,” Rushambuza naayijuka.

Obwire obwo, Rushambuza naayijuka ngu abakama bakaba baraba omu byaro kukwata abaana babooro abatarikuza kushoma, kwonka omuka yaabo bakaba batahikamu ahabw’enshonga y’okugira ngu abakama boona bakaba bari banywani b’ishe.
Obwe abazaire be baaherize kufa, omu mwaka nigwo gumwe, ogwa 1942, obu ba missionaries bataahiremu, bwanyima Rushambuza na Binyindo hamwe nabandi bantu bakamanya omugasho gwo’okushoma n’okushomesa abaana.

Okutunga sente

“Eshente nkaziiha omu kukora,” Rushambuza naayatura. Bwanyima yokutunga sente, Rushambuza akaija yaayegurira eitaka ahari Ntungamo eri ariho, obwahati ahabwa shs230= zonka kuruga ahari muhara w’omungyenzi Mukuri, Bafunda. Bwanyima nikwo kwombekaho enju ya akanyankole (ebinyatsi) yaija yaagirugamu yaayombeka enju ya mwamba.
Obwe arikuruga ow’ishe Katonjo, Kyeizooba, Rushambuza akaba aine abaana 2; Obadia Ntebekeine na John Nshemereirwe.

Okuruga omu kwombeka

Rushambuza akaija yaaruga omu mirimo y’okwombeka bwanyima y’okushomesa abaana be, abaatungire emirimo, bakatunga sente.
Omu mashomero marungi agu Rushambuza yaashomesizemu abaana be na sente ezi yaabaire naatunga kuruga omu kwombeka ni; Mengo, Lubiri, Jinja SS na Mbarara High School.
“Obwire obwo nkaba naatungire sente, nkaba naatyarize kandi nyine oburyo!”
“Omwana wangye Obadia akaija yaangira ati taata ruga omu mushenyi ahabw’okuba akaba naareba ngu nkaba ninkora omurimo mubi kandi yaatungire sente.” Rushambuza naagira ngu akashutama yaaronda eky’okukora bwanyima omutabani Obadia nikwo kumuheereza obushagiki bw’okuza omu kuriisa ente (farming.) “Okwiha obwo, nkaba ntarikubaasa kutsigaho ente zangye ngu ninza omu mirimo endiijo kandi na hati ente zangye nizo zimbitsizeho.”

Okugura motoka y’okubanza

Nk’eizina ryo’omwana we Ntebenkeine, Rushambuza akaija yaatebekana yaatunga sente yaahika nahakutunga ekitekateeko ky’okugura motoka ei babaire nibeeta Austin, kuruga omu bahindi obwire obwo.

Endaijo mirimo eyi yakozire

Omu mwaka gwa 1960, Rushambuza n’omwe omu bavugi ba za lorry abaavugire omwani gwa Banyankole Kweterana obwe arikugutwara Kasese.
Rushambuza niwe ishenkuru w’ekika ky’abagoma kandi ekitiinisa eki akakitunga ahabw’okugira ngu ishe, omugyenzi Mutimbo nuwe yaabaire ari omutwe gwa’abagoma ningashi mukuru w’abagoma ahabw’okugira ngu nuwe yaabaire aine engoma ya Kihoza. Omungyenzi Mutimbo akafuruka Mpororo omuri Rukungiri bwanyima yaaza Bitereko kuhitsya ahu yahikiire omuri Kyeitembe omuri Bushenyi nikwo kusharamu akaruga Kyeitembe akaza Katonjo hihi na Rwentuha omuri Kyeizoba.
Okujunwa
Rushambuza akajunwa omumwaka gwa 1942 yaaruga ahakuretsa enyungu hamwe n’amarwa agu arikugira ngu tarikwenda agareebe omu maisho ge.

Ebi akoraire ekanisa

Obu ekanisa ya Bweranyangi yaabaire neeyombekwa, Rushambuza akaheerezayo ente ze 7 ngu obundi ekanisa ekayombekwa ehwa. Rushambuza nk’oku arikugira ngu taine eki arikubaasa kukorera Ruhanga kumusiima, ayombekire ekanisa ya Ntungamo ahu yaabaire yaayombekire eishomero kwonka ryashennywa ryahindurwa omu mwanya ogundi.
Naagira ati, “mukahebwa busha nahabwekyo muheere busha.”

Okushwera

Ahabw’okugira ngu akaba yaahwerize, kandi arikuruga n’omu maka gahwerize, Rushambuza akaija yaayerimira omukyaara we….owatweirwe omumwaka……
“nkamushanga owaabo naamugira nti nkaninyenda kukushwera? Kwonka tarangarukiremu kwihaho akahunama ahabw’okuba obwire obwo, kikaba kitoorobi omwishiki kuza kwikiriza batari nk’abaahati abarikwikiririzaho.” Bwanyima akamutsindikira abantu kuza kugamba nawe ngu aikirize.

Ebi arikukunda

Amagara ga Rushambuza goona gari omukanisa, okusiima Ruhanga kandi kumanya ngu n’amazima, agyerizeho nakucoondoza obukomooko bwe’ekanisa obwe arikuza omuri Israel omu maka ga Yesu ahu yaamazire esande 3.

Ebirikumusasa

Rushambuza naagira ngu ekikumusaasa n’okushanga ngu Uganda eshomiise abantu kwonka negi shaha, tihariho munya Uganda orikubaasa kukora akagirita, ekibiriti…….
“Kushanga ngu tihariho muntu orikubaasa kukora omubazi gwo’okutambira ente zaitu eziriyo nizifa?”
“Okushoma kwaitu n’okwaki kandi nikukoma nkahi ahabw’enki tutarikubaasa kwebuuza aha mahanga agarugireyo gakatugambira okugabasize kukora gakarugayo?”

End.

ABOUT US

Muga Eco Village is a private family ecotourism site that started in 2012. We run & support activities that advocate for and promote environmentally friendly approaches to life and leisure.

We’d love to host you

To date, Muga Eco Village has been visited by different people including; private farmers from within and outside Uganda, local government leaders, churches, research institutions, technical staff of Bushenyi and Sheema districts local governments.

 1,353 total views